Nindamugeithia inywi othe.
Ndina kiuria. Thinii wa mwandikire wa Gikuyu, he ciugo cigucagio tukiaria. Ukiadika, no wandike vowels igiri (vowels ciitagwo atia na Gikuyu?)kana imwe. Kwa muhino ri, 'Gucera kana Guceera". Nii nyandikaga na ndemwa imwe, ta gucera. Ni hari utiganu munene tiga mutaurire? Ona gutwika ni ngumenya mundu ureruta Gikuyu angienda ndemwa igiri ni getha athome uria ritwa riandikitwo, ni hari watho?

Rekeni njigwe meciria manyu.

Wanaruona,

Ona nii uhoro ucio ni uhingicaga na no nyende kumenya muno uhoro wa ma. No he maritwa mamwe maria no kinya wongerere syllable (na ndiui syllable niki na mbuku ya utauri wa ciugo iria andu maragia - dictionary iria ndi nayo ndiri ritwa riu) tondu ungiaga gutumira ni icenjagia uria kiugo kiugo kiugite. Njitikiria huthire ritwa ta: maai (water) na mai (poop).

No kuri mwarimu njorua wa ndeto cia ruthiomi (kana thiomi) witaguo Sajini oka niagutuhe uhoro.

Ngunjiri

Hîndî îrîa ndathomaga Gîkûyû twetaga 'vowels' mîgambithia. Ndiûî kana rîîtwa rîu no rîtûire. No nguona nîwega tondû hatarî mĩgambithia ndemwa ici ingî itingîkîgamba, kana tiguo? Rĩĩtwa rĩngũ hihi rĩngĩtũmĩka nĩ mĩtamũkithia

Niĩ nyendaga kwandĩka ndemwa igĩrĩ ongorwo mũgambithia nĩũgaathĩĩtwo kana kũraihio. Gĩtũmi nĩtondũ kwandĩka ndemwa igĩrĩ nĩ gũteithagia mũndũ agĩthoma (kana akĩandĩka) na gũgateithia athikĩrĩria aake (kana athoomi aake). Ona gĩkungjo gĩkĩ akirithitiano mathomaga gĩkoragwo na ndemwa igĩrĩ rĩrĩa mũgambithia wagaathwo.

Ni ngatho Ngunjiri na Sajini.
Nindakena ni maoni manyu. No riu muthuri ti Ngunjiri ri, maî na mai me ngurani ya migambithia (Sajini nduri kau) ya muico.
Undu uria ungi ti andu othe magucagia, kuringana na kuria umite. Tariu nii Gikuyu giakwa ndingiuga athoomi ta Sajini, tondu gwitu tutigucagia.

No tariu ungienda gukuranithia -ni hari (riu) na ni ha(a)ri( tene), hau hena bata kuongerera mugabithia-kigucia (kiu ni kia W@naruoa).
Nindetikania ati hari murutwo, kwandika migambithia iri kwina uteithio munene muno.

Rekei twirutanirie na ruthiomi rwitu, niukuona ni hinya kwandika tutegutukania na kimonimonio.

(Njohera i ni kwaga gwikira tung'ong'ori, ni twaoaga mathaa maingi ma kwandika na guku kwa Waithaka maisha ni mburuguto).

Thayu

Wanaruona,

Wambere reke nyambe njuge nindakenio ni uria wandikite ati kuria ukoraguo, ati Kwa Waithaka no no ukainuka? he he he! hau ni hangenia muno. Karîbû mucii riria ugacoka (lol!)

Uria ungi ni uhoro ucio wa migambithia. Ni wega niundu haha kuri andu mareruta ruthiomi ruru ruitu, ni hari bata guikira migambithia iiri haria hagiriire nigetha mahota kumenya ni ha hagucagio na niha hatagucagio.

Nguhuthirite kionereria kiu kia maai ma mai niundu wa uguo wauga uhoro wa guikira tung'ong'ori (he he he he, ithui tuatuitaga tuthurubia ni kwaga ritwa ringi ria gutuita). Ungikorwo na ihenya ta nii na we wage ihindi ria gutuikira na wandike maritwa mau no marehe nganja.

Turi o hau ha miandikire ri, nuu ukunjira kana ni gikuyu kiriku kiega, ni kuhuthira "u" kana ni "w" maritwa-ini. Kwa muhiano "ndathii kwa nyina Sajini" na "ndathii kua nyina Sajini"
gwikira - guikira
kwandika - kuandika
twahiaga - tuathiaga.
kwiruta - kuiruta.
Hau ni hahingicaga na nii thiaga ngitukanagia.

Ngûnjiri
Gûtuîkaha 'û' na 'w' na 'i' na 'y' nîikuruhanîîte mûno kîmûtamûkîre. Nîkîo wonaga andû amwe makîandîka 'kûa nyina wa Sajini, kana kwa nyina wa Sajini.

'w' yaumire mûtamûkîreinî. Hîndî îrîa ûratamûka mûrîmanîriro wa 'û' na 'a', kana 'u' na 'a' rî, ndûngîhota gûcitamûka hatarî 'w'.


Kuoguo no tuuge 'w' îîkîragwo nîgetha îhûthie mûtamûkîre, na tondû wa gûkuhanîrîria na 'û' rî, îkîhatîka 'û' nginya îkîmîingata, ta njogu îrîa yahoiire îingirie mûtwe îîyûûwe mbura îkîîngîria mwîrî wayo wothe nginyagia îkîîngata mwene nyûmba hehehehehehehehe. Ni ndiûî kana aandîki a Gîîgîkûyû nîmaiguithanîirie nî mwandîkîre ûrîkû mwega. Niî menyerete 'w', handû ha mûgambithia.

Thaaaaaaai

Muriega nyumba.
Ngunjiri nima nongainuka.... thiaka wakwa na uta ciri oharia ndacuririe.

Meciria makwa ni ati hatiri ihitia kuhuthira 'w'. kimwaririe riria twina 'ua' thutha wa ndemwa ingi, ihanaga ta ciarungwo igatwika 'w'. Na tondu migambithia ino iri niikuhihagio ri, nokio naithwi twandikaga 'w'.
No hari bata tukimenyage ati kihumo kia 'w' ni migambithia iri.