Juma niturari na kamucemanio kanini ka anake guka kumenya mucie gwitu. Ninguririkana makiurania anake matwaraga kii kwa muiritu. Mutigiithererie tondu angi moigaga anake gutiri kindu matwaraga no gucera nao angi metikiitie ni matwaraga kindu kinini. Thegio.

kanyoni,
Anake magithii kumenya mucii nimagiriirwo guthii na kindu kinini , gwitagwo kuhanda githigi, uguo nitakuga ati ithe wa muiritu ndangiamukira mwanake ungi ungiuka akienda muiritu ucio uguo anake akorwo matiahandire githigi kwina ugwati tondu mwanake ungi nooke nahande githigi uhoro urituhe.

ndinakunga!

Hau Wagithuri hari kaundu gaatananyingira.

Matuku turi tuugaga ni kia wendo. Angikorwo no muhaka uhande githigi nigetha muiritu ndakaneanwo kuri mundu ungi-ri, githi ti gukiuga muiritu ucio ndakwendete, na ni gutukania aratukania? Nii hakwa ni ati angikorwo ni mwendaniite hatiri bata wa kuhanda ithigi tondu muiritu no agagigweterera.

No na hau kabere nituui uria gwakihanaga. Muiritu ndaari na wiyathi munene wa guthuura uria ukumuhikia, na mundurume o wothe wina mburi ni aari na kamweke ga kuhikia muiritu. Nikio haari bata wa kuhanda ithigi, no thiku ici ndikuona ta hari bata wa ithigi.

Nindogomia?

Niukuririkana karwimbo karia ka Mucaimo karia gathiaga uu...

...nama ti kumuconora
nii ndonire ndingihota
indo iria ciothe iretio
ni ithe wa kairitu kau...

Sajini,
Ithigi riri rihandaguo thiku ici no njuge ti riu riari ria tene ona gutuika andu nimarihuananagia. Nii ingiuga ni ta "symbolic" ya guthii kuga ati niuri na itanya ria kuhikia muiritu kuuma mucii ucio.

Njoke hari kiuria kia Kanyoni, nii ndonaga ta mutambite kuhanda ithigi ta mwanake athiaga kwa muiritu agatuaruo ni mwanake ungi murikawe magathii kumenyithanio kuri aciari a muiritu matanamba guka kuhanda ithigi. Icera riri ritiarutaguo kindu kinya riria magoka na muthuri kana athuri maigana una kuhanda ithigi. No matuku maya nyonaga maundu maya magikuo oro hamwe, kumenya mucii, kuhanda ithigi, na kinya kuracia.

Na njuge maundu maya mekaguo na mithemba ngurani ngurani kuma mucii umwe kinya uria ungi na kuma itura rimwe kinya riria ringi.

nii no hindi ndirahandire ithigi na reke njuge ati maundu maya mari okuo.reke nyambe ndegane na muthuri ti Sajini ati kuhanda ni kuonania muiritu ndakwendete, aaca kwaga kuhanda ithigi ti uuru angikorwo nduri na uhooti no angikorwo wina uhooti gwika guo ni wega tondu ni gutumaga wendo wanyu ugie na kinyi na muthingi mwega. its a sign of goodwill for both parties.ningi niwega tondu noguteithagiriria kuiga unduire witu amu mutiga unduire wake ni ngombo.

Njung'e,
Hau ni waria ma, ni kionania kia gukindira urata wa mihiriga iyo yeeri na ni kuiraguo ciungano-ini ta icio tondu ndanagikorwo ho ati andu nimatuma ndugu kuma muthenya ucio. Na tondu mugithiaga mucii ucio ringi kundu mutaroyaine ri, gigikuyu andu nimagithiaga ugeni moko matheri?
Urari kuu ithigi wa Wamaitha na ndwanjitire ngutuare? he he!

Ũgĩkũyũ-inĩ, nĩ mũhĩrĩga (kana nyũmba) ũgũranaga na mũhĩrĩga (kana nyũmba) ũria ũngĩ. Ũthoni ũkoragwo ũrĩ wa nyũmba yoothe. Ti wa mwanake na ithe wa mũirĩtu marĩ oike. Nĩkĩo andũ moigaga “aya nĩ athoni aitũ.”

Nĩũndũ ũrĩ thoni mwanake kwarĩrĩria ũhoro wa ũthoni na ĩthe wa mũirĩtu. Nĩ kĩo ũhoro ũcio wĩtagwo ũ-thoni. Kĩrĩa anake mekaga no gũcera na kwambĩrĩria gũtũma ndũgũ thĩiniĩ wa mũciĩ ũcio marenda kũgũrana. No matirĩ rũtha kwarĩrĩria ũhoro wa ũthoni na aciari a mũirĩtu. Andũ arĩa makoragwo mahetwo ũhoti wa kwarĩrĩria maũndũ moothe ma ũthoni nĩ aciari. Ona mwanake (kana anake) angĩtwara kĩndũ kwaa mũirĩtu, aciari (kana athuri) a mĩena yeerĩ matacokanĩtie ndundu, hau no ta ũria tũngĩcemania nawe mũngetho ũngũrire gĩkombe kĩa ndubia ĩno mata. Hau hatirĩ ũhoro wa ũthoni.

Gũtuĩka atĩ nĩ nyũmba (kana mũhĩrĩga) ũragũra mũirĩtu, nĩ ũndũ ũrĩ bata mũno. Mũirĩtu agũrwo nĩ nyũmba atuĩkaga wa nyũmba ĩyo, na akegwatĩra magai moothe ma nyũmba ĩyo. Tũngĩrora wega, Agĩkũyũ nĩmakoragwo marĩ “gender sensitive” mũno gũkĩra andũ a ndũrĩrĩ. Ũgĩkũyũ-inĩ gũtirĩ hingo mwanake ũtagũranĩirwo angĩaheirwo handũ ha kũrĩma nĩ nyina. Mĩgũnda yoothe ya kũrĩmwo yakoragwo ĩri ya atumĩa. Mĩgũnda ĩyo yagayagwo nĩ atumia a ariũ ao. Ũguo nĩtakuga atĩ, mũtumia owoothe agayagĩrwo mũgũnda wa kũrĩma nĩ nyaciara-we. Nao anake magayaga ũhiũ kuma kũri maithe mao. Nĩmũthũngũ ũrokire kwĩra arũme makoragwo nĩo ene mĩgũnda ya kũrĩma. Arũme mĩgũnda yao yakoragwo ĩri ithaka, na nĩkuo mahiũ mao marimuthaga. Nao atumia, ithaka ciao ciakoragwo cirĩ mĩgũnda, na nĩkuo marĩmaga.

Reke njoke mbara nginyo. Ngugĩte atĩ ũhoro wa mũirĩtu kũgũrwo nĩ nyũmba warĩ ũhoro wa bata mũno thĩ-iniĩ wa Gĩkũyu. Ũgirora, thĩiniĩ wa mabũrũri ma ndũrĩrĩ, ta Njaruũ (luo) oro kana Gĩthii (kisii), mũndũrũme agĩkua, mũtumia (kana atumia) wake no mũhaka agĩhikio nĩ mũndũ ũngi wa nyũmba yao. Mũtumia angĩregana na ũhoro ũcio, no athamire nyũmba ĩyo, athiĩ akeikarie. No thĩiniĩ wa rũrĩrĩ rwitũ rwa Gĩkũyũ, ona mũthuri angĩkua, gũtirĩ hingo mũtumia agĩerĩrwo acooke kwao, atĩ tondũ mũthuriwe nĩakua. Mũtumia ta ũcio aikaraga oro mũciĩ ũcio, arĩ wa nyũmba ĩyo yamũgũrire. Gũtirĩ hĩndĩ atangĩagaire magai moothe marĩa agĩrĩirwo nĩ kũgaya atĩ tondũ mũthuriwe nĩ akua. Nyũmba ĩrĩa yamũgũrire ĩtagĩkuĩte, na ĩrĩ oho.

Mũtumia ũcio akoragwo na wĩyathi wakũmenya kana nĩ ekwenda gũthambio, nĩ mũndũ ũngi kana, aca. Angĩendire gũthambio, tonginya angĩathambirio nĩ mũndũ wa nyũmba ĩyo.

Taugai ĩĩtha ndĩmũhe karũgano kanini. Kũũria itũra rĩa gwitũ nĩ kũrĩ mũthuri warĩ na anake eerĩ na airĩtu eerĩ. Mũirĩtu ũmwe nĩ agĩrĩire ihĩĩ igĩrĩ mũciĩ kwao, na ndahikire. Mũirĩtu ũcio ũngi akĩhika nake akĩrathimwo na ihĩĩ ithatũ. Agĩcoka magĩtigana na mũthuriwe. Agĩcoka kũrĩ aciari ake naihĩĩ ciake ithatũ. Mwanake ũria mũkũrũ nake akĩrathimwo na ciana cia airĩtu igĩrĩ. Kwamutino agĩcoka agĩkua. Mwanake ũria mũnini nake akĩhikania. Atananina mwaka ũmwe kuma ahikania, akĩgĩa na mũtino wa barabara, nake agĩkua atarigithathĩte. Mũtumia wake thutha wa mĩaka karũndo agĩciara ihĩĩ ciake ithatũ.

Mũciĩ ũyũ ũtigĩtwo na aciari na airĩtu ao erĩ na atumia erĩ a ciana ciao. Hĩĩndĩ ĩrĩa gwatuĩkire atĩ indo cia mũthuri mwene mũciĩ nĩ cikũgaywo, mũthuri, ũcio oigĩre atĩ indo ciake no cigairwo nĩ mũtumia wa mũriũ ũcio wake mũnini. Akĩgeria gũtheria ũhoro ũcio oigire atĩ, mũtumia ũcio nĩamũciarĩire ĩhĩ ithatũ, na mũtumia wa mũriũ ũrĩa mũkũrũ ndamũciarĩire kĩhĩĩ ona kĩmwe. Mũthuri ũcio aiguire arĩ ũhoro mũnene, athuri a itũra makĩmũthaitha agaĩre airĩtu ake erĩ indo, toondũ marĩ na ciana na maraikara gwake. Mũico-inĩ wa ũhoro mũthuri oigire atĩrĩ, “ndagaĩra indo ciakwa atumia a ariũ akwa eerĩ. No mũtumia wa mwanake ũria mũkũrũ agaĩre arĩ a nyina na mũthuriwe indo cia mũrũme, na maigananie oothe atatũ, na ndikwenda kĩũria kĩngĩ”

Rĩũ, kĩũria kĩria tweyũragĩa nĩ atĩrĩ, kaĩ mũthuri akĩgaĩra indo ciake hakuhĩ cioothe, mũtumia wĩ na ciana itarĩ thakame yake ona itata? Atiga atumia arĩa mena ciana ciĩna thakame yake? Mũthuri rĩria twamũririe kĩũria kĩu, atwĩrire ati, “aya nĩ andũ anja, na mũndũ agĩrega kũingĩra nyũmba atũraga nja, na gũtirĩ hĩndĩ agĩgaya indo cia nyũmba, tondũ ti wa nyũmba na ndagũrĩtwo nĩ nyũmba. No ũria ũgũrĩtwo nĩ nyũmba nĩ wa nyũmba na ciana ciake nĩ cia nyũmba. Na nyũmba na rika itiumagwo. Kwoguo, mũtumia ũcio, na ciana ciake gũtirĩ hĩndĩ magiuma nyũmba ĩno itũ, nĩ tondũ mũtumia ũcia nĩ agũrĩtwo nĩ nyũmba. Mũndũ wĩna kĩũria kĩngĩ nĩ orie.” Mũthuri atwĩra tũrie kĩũria kĩngĩ, no ndereti twogomirie, tũkĩrehe ndereti ĩngĩ.

Mũndũ wangenia nĩ wagakuru nĩ kuuga atĩ maũndũ maya moothe makoragwo marĩ "symbolic", na tũngĩrora weega makoragwo makĩgwetwo na “metaphor”. Tarora marĩtwa maya moothere (kũgũrana, kũhanda ithĩgĩ, kũguraria, njohi ya njũrio).

Riara,

Ni waria uhoro wa ma ucio wa uria uthoni wathiaga. Ni mahitia muno hari mwanake kwiguranire gigikuyu, uguo ona haria athuri na atumia macokonagia ndundu, kuri nyumba itetikagiria mwanake atonye ndundu ini iyo ona wakorwo ni guthikiriria tu. Njung'e wa Wamaitha ni ndironire e na mworoto uyu na ni wega amenye maundu maya ndakanaiye guita akionoria.
Ndauga uguo tondu ungirora ona ritwa ta kugura mutumia ni hinya muno korwo ni uhoro wa ma wikaguo. Ndiguiciria kuri mundu ungigurika na indo cia guku thi. No mihiriga niyatuaraga indo kuri muhiriga uria ungi ari ta ngatho ya kumaciarira na kumarerera muiritu na ari ta njira ya gutuma ndugu gatagati ka nyumba icio cieri.
Undu uria ndiyuragia na ni turaragia na muthuri murata wakwa ni kana maundu maya nimeguikara na ni gwa kahinda kaigana atia tondu riu athuri aria mooi maundu macio nigututiga maratutiga.

Ngunjiri,

Hau waria ma. Ma theri. Maundu ma uthoni ni ma bata muno, na ni magiriirwo gwikirirwo muno. Ota uguo woiga, gutiri hindi mundu angigurika na indo cia guku thi. uhoro wa kuracia uhana o ta gutheca kirore, na hakorwo na aira ati nyumba icio cieri ni ciatuma ndugu. Ritwa kugurana ti riuru, tondu rihuthagirwo ta ari ngerekano.

No ta uria mundu arua, eragwo ni agimara. Na nituui ati gutiri mundu uri na uhoti wa kugimarithia mundu ungi. Ugimari wa mundu ukoragwo uri mwiri-ini wake. Mundu ona ndamenyaga akigimara. Ekoraga ni agimarite. Tiga no ndariri nyinyi cikoragwo ci hana ta cia kumumenyithia ati riu ni aragimara. Ndariri ta kuimba kwa nyondo, na icio ingi.

Gikuyu-ni, maundu maaingi maheyanagwo na njira ya ngerekano.


Otauguo watwira, Maundu maya ma uthoni marathii mahwererekeeeire. Na andu aria mamoi wega, ni gututiga maratutiga.

He handu hakinyire, aciari magitigira arutani wira wa kurera ciana. Makiriganirwo ati arutani marutanaga mutabarire wa githomo kia marua, uria umite ugeni-ini. Gugicoka gugikinya handu, aciari mona ciana ciao ta ciathoma, magiciitigira. makiriganirwo ni uria kwiragwo, mukuru gaya wonie muruna mugaire. Uhoro ucio ugituma ciana citikamenya mugaire. Miaka ya manjaneti nayo, riria twahuraga muthungu, nayo miikarire na unduire witu nikuhurwo cia huragwo. Hindi ya manjaneti, niguo mathingira maninirwo, hindi iria andu matwarirwo Ichagi.

Thiinii wa andu aria matigitwo micii, ciana, ihii, airitu, anake, muthuri na mutumia, oothe akirwo makomage (kana maikarage) nyumba imwe. Hau mathingira mathirire, no ho kirira giathiriire. II tondu, muthuri ndagiahotire gutara anake ake, airitu me hau. Nake mutumia ndagiahotire gutara airitu ake, ihii cii hau. Uhoro wa gutarana ugikinya muthia hau.

Manjaneti yathira, andu macoka migunda-ini, mathingira matiakirwo. Uguo ni ta kuga ati githomo kiria athuri mathomithagia ciana ciao cia anake, gitiacokire guthomithanio.

Riu haha niho twariganiirwo ati waathi ni ukuraga. Na waathi wakura wongagirirwo ungi. , Uyu witu twarekire ukure, utekuongererwo ungi. Nikio turona ati waathi ucio urathii uthirite, ni tondu nduongereragwo.

No uria kuhana ni ati, ona ugihata nyumba maita igana, no kurikorwo na karukungu. Kiu nikio gikeno giakwa, ati ona mitugo itu ithiite ihatitwo, ihatitwo, karukungu no karitigara. Ni gaceneni kana thandi ya mwaki, ina uhoti wa guthegeya na igwate na icine kiriti kimwe na kingi, ona kingi.

Munyaka uria ungi twi naguo ni ati kuri andu mateithirio ni Ngai, makiandika maundu manya mabuku-ini, na mundu o woothe ungienda kumathuthuria, ari na kamweke ga kumathuthuria, na kamweke ga kumarumirira.

This message has been edited. Last edited by: Riara Wa Kariara,

Riara na Wa Wakuru,
Reke njuge ndikwenda gukararania nainyui niamu nikuri nguurani ya mirorere ya maundu. Nii hakwa ni ati maundu mamwe matiri na kuguni hari muikarire wa matuku turi. Raracio, kana ugurani, o riitwa riria urihuthagira ni uhoro muhituke ni mahinda. woni wakwa ni ati aanake makihikani, marutaga ruracio, ti undu wa gukorwo mari na wendi ucio no ni ati tondu niguo mutugo. Nake 'mugurwo' agakiona ati niahaica madaraka niundu wa kurutirwo indo. Nikio ungiigua akiiyatira andu aria angi ati 'nii ndi mugure na ngaguraririo'

Riara, hari marua macio maaku ma hau kabere niwaririe uhoro wigii ugai. Ona gutuika ukwaragia uhoro ucio uri ngerekano-ri, kiuria giakwa ni giki, muthuuri niamukiririe miti ya ciira, no ni hari na kihooto gia kwaga kuigaira ciana ciake cia airitu?

Sajini,

Ha uhoro wa cira wa ugai wa indo cia muthuri ucio, watho wa Kenya ni uhete mundu woothe uhoti wa kwigaya riria ari muoyo. Gikoragwo gi kihoto kia mugai kugaya indo ciake riria ari muoyo. Uguo ni kuga, ki watho, muthuri ari na kihoto gia kugaira indo ciake mutumia wa muriu ucio munini.

Ni kio hindi iria twamenyire uhoro ucio, twacaririe athuri mathii magathaithe muthuri ucio. Thutha wa guthaithwo, niguo itikirire kugaira airitu ake igai riao.

Kiuria kiria woria kiega, ni kana ni hari kihoto kia kwaga kugaira airitu? Ki watho wa thirikari ya Kenya, muthuri ucio ari na kihoto. Airitu acio ake, ni mendaga kumutwara igoti-ini ati niguo matuike agai ake. Twarora uhoro ucio, niguo twamatarire, na tukimoria matuhe kamweke ga gwetha athuri mathii magathaithe ithe wao.

No uria gukiri ni ati, ithe wao ni erire aka a ariu ake ati, no nginya airitu acio ake eeri, makeegura niguo matuike agai a indo cia nyumba. Ndiui kana ni uri waigua ati airitu nimeguraga? Ini niguo matuike andu a nyumba, na niguo makorwo mari na kihoto gia kwendia airitu ao.

Uhoro ucio wa airitu kugaya, ni wari thiinia wa kabiba muhiano, iria ya Wako twaregire. Hakwa reke njuge ati, angikorwo airitu ni mekugaya ithe ( na nyina) wao-ri, rekei tutige gucagurania airitu aria mahikite na aria matahikite. Nikii kiratuma andu mende oro airitu aria matahikite magie na kihoto gia kugaya?

Sajini,
Tarora uhoro uyu. Kuuria cool pastures ni kuri ndonga imwe, ikoragwo na mugunda ika magana matandatu. Kairitu gake karia kanini gakihikio ni kanda imwe yarutaga wira, kwa ndonga iyo. We niukuona ndonga ino ta igukeeena ati mwari ni ahikira kanda ino. Kanda iyo, kwaria ma, yagaiirwo nuthu ika ni ithe.

Ndonga ino riria arathire kwandika will iragaiire airitu ayo eeri mari na ciana, no matihikite ika igana rimwe o muiritu. No kairitu gaka kanini, gatinagwetwo ona ritwa thiinii wa will iyo. Kairitu (Reke ndigete uguo, ona gutuika ni mutumia wene, uraciirio. Ndiui kana nimuguraririe)gokire gwakwa riria kamenyire uhoro ucio, gakinjira ni gekwenda ndikere uria kangika. I tondu, ko no mabuti karimagia. Gakinjuria atiri " Riara, kuhika na kwaga kuhika ni atia wega. Ni kii kiri na uguni, kuhika kana kwa kuhika" "

Ndarora uhoro ucio, ndauthuthuria muno, ngira kairitu gathii macoke moke na muthuriwe. Nii na urimu wakwa, ndonire ngumahe maundu matatu.

Gimeera mathii na ihenya muno kuri ithe, mari na ciringi ngiri ithatu, mere ithe ati mooka kumuthaitha amenderie mugunda wa ciringi ngiri ithatu.

Wona arega, Mamuthaithe agaire kairitu mugunda.

Kwarema uguo, Kairitu kere ithe acokerie Kanda indo ciayo, niguo kahote gucoka mucii kagairwo mugunda ota iri a nyina. Kai gukiri wa nda na wamugongo.

Nogikimera atiri, undu uria muru, nogutigana ni undu wa magai ma guku thi. No ati-ri, hindi ino turi guku thi, magai mau hindi iria mari ho, ni twagiriirwo ni kumamatha na kumathingata.

Githi ndukuona, airitu magiona ati maithe maao mari na indo karundo kanene, nimekwigagatia kuhika? Nagithi ti hau turageria kuhitana naho. Aria agi ma menya ati mundu angicoka kwa, no ruthanju rwa mugunda ekwigwatira, niukuona ta angiciria ria keri mangihitania na murume. Na githi ti maundu maya turageria kuhita.

Kai rui ruhitagiririo hindi iria runite. ngithi, ruti kihitagiririo rutanauna. ugigeria kuruhitiriria rukiuna, kai rutegugukua uthii naruo.